Ko‘krak bilan qanday emizgan ma’qul

Nutricia club tayyorlagan ushbu qisqa videoni ko‘rib, bolani ko‘krak bilan qanday emizish ma’qulligi to‘g‘risidagi qadam-baqadam qo‘llanmaga ega bo‘ling

Tug‘ruqdan taxminan 2-4 kundan keyin ko‘kragingiz to‘lib boradi, chunki Siz ko‘proq ko‘krak suti ishlab chiqara boshlaysiz.

Har safar emizishni boshlaganingizda chanqoqni qondiruvchi, uglevodlar, oqsil va vitaminlarga boy — oldingi sutni ishlab chiqarasiz, u farzandingizning suv balansini ta’minlaydi. Farzandingiz ovqatlanishni davom etgani sari, Sizda keyingi sut ajralib chiqishi boshlanadi – u quyuqroq, ozuqaga boyroq bo‘lib, to‘yganlik hissini uzoqroq saqlab turadi.

Ammo bular sutning ikki xil turi emas, balki oldingi sut bilan boshlanib, emizish paytida keyingi sutga o‘tadigan davomiylikning yakuniy nuqtalaridir. Siz o‘z farzandingizga beradigan har qanday ko‘krak suti uni kerakli ozuqa bilan ta’minlaydi va unga hayotning eng maqbul boshlanishini taqdim etadi.

• Qulay kresloga yoki yostiqqa suyanib o‘tiring.
• Bolani ko‘kragingizga olib keling va unga suyanishiga qo‘yib bering.
• Bola bo‘ynining orqa tomoni va yelkalarini tutib turish kerak, ammo boshi erkin harakatlansin.
• Emizish paytida bolaning butun tanasi Siz tomonga burilgan bo‘lishi kerak, shu sababli uning qorni doim Sizga qaraganligiga amin bo‘ling.
• Emizish paytida bolaning qo‘llari erkin harakatlanishiga qo‘yib bering. Bolaga emizish paytida ko‘kragingizni ezish yoki teginish imkonini berganingizda, sut ishlab chiqarilishi yaxshilanganligini sezishingiz mumkin bo‘ladi.

Vaqt o‘tgach, Siz farzandingiz qanday holatda ovqatlanishni xush ko’rishini bilib olasiz, ammo ungacha to‘g‘ri emizishning umumiy belgilariga e’tibor bering:

• Bola ko‘krakdagi sutning aksariyat qismini iste’mol qiladi.

• Dahani ko‘kragingizga zich tegib turadi.

• Ko‘krak uchi va ko‘krakda noqulayliklar sezilmaydi.

• Bolaning o‘zi, qorni to‘ygach, ko‘krakdan chetlanadi.

• Emizish paytida yuzlari yumaloqlangandek ko‘rinadi. Shuningdek, qulog‘ining atrofidagi harakatga e’tibor bering – bu yutinishning yaxshi alomati.

Ko‘pgina onalar bolalari yetarlicha sut emmayotganidan xavotirlanadilar, ammo dastlabki bir necha kun davomida yangi tug‘ilgan chaqalog‘ingizga bor-yo‘g‘i bir necha choy qoshiq og‘iz suti yetarli bo‘ladi, chunki uning qorni hali kichkina bo‘ladi. Shunga qaramay, u har soat ovqatlanishi mumkin. Shuningdek, farzandingiz tug‘ilishidan keyin birinchi haftada 5-10% vazn yo‘qotishi tabiiy – bu suyuqlik yo‘qotilishi tufayli ro‘y beradi. Ammo, agar vazn yo‘qotilishi 10%dan oshsa, bu borada sog‘liqni saqlash sohasidagi mutaxassis bilan maslahatlashing, chunki klinik baholash o‘tkazilishi kerak bo‘ladi. Ikkinchi hafta oxiriga borib bola kerakli vaznni yig‘ib, o‘sa boshlaydi.

Farzandingizda yuqorida keltirilgan barcha alomatlar kuzatilganida ham, baribir, Siz u qabul qilayotgan sut miqdori haqida xavotirlanishingiz mumkin. Emizishlar soni borasida biror qattiq belgilangan qoidalar yo‘q va farzandingiz ulg‘aygani sari uning ehtiyoji o‘zgarib boradi, har 2-3 soatda, jumladan kunduzgi va tungi emizishni ham mo‘ljal qilib oling.

Farzandingiz yetarlicha ovqatlanayotganligini bilishning bir necha usullari:

• 3-5-kundan boshlab u vazn yig‘a boshlaydi. Aksariyat bolalar dastlabki 2 hafta ichida tug‘ilgandagi vazniga qaytadi.

• 4-kundan boshlab va dastlabki bir necha hafta davomida bolaning ichi sariq va anchayin suyuq keladi. Bolaning kuniga kamida 2 marta ichi kelishi kerak.

• 5-kundan boshlab, bolaning tagligini har kuni kamida 6 marta almashtirish zarur bo‘ladi.

Yodda tuting: farzandingizning qorni to‘yishi bilan, uning o‘zi ko‘krakdan chetlanadi. Ayrim chaqaloqlar, tabiiyki, emizish paytida tanaffus qiladilar, shu sababli, u dam olayotgani yoki qorni to‘yganligini bilish uchun biroz kutib turgan ma’qul.

Ko‘krak suti farzandingizni kerakli barcha ozuqalar bilan ta’minlaydi va ko‘pgina afzalliklarga ega, farzandingiz qattiq taomlarga o‘rganganida bu afzalliklar saqlanib qoladi! Bolani 6 oygacha faqat ko‘krak suti bilan emizish, keyin 2 yilgacha qo‘shimcha taomlar bilan birga oziqlantirishni davom etish, uni ilk bolalik davrida eng yaxshi ozuqa bilan ta’minlashga yordam beradi.

So‘nggi yangilash: 2020-yil 13-iyul