Doğuşa hazırlıq və planlama

Nəhayət ki, vaxt gəlib çatanda həyat yoldaşı olaraq özünüzü əmin hiss etməyiniz hazırlıq və planlaşdırmadan asılıdır. Doğuşun nə demək olduğunu başa düşməklə siz təkcə həmin gün oynayacağınız ikinci dərəcəli rola hazır olmayacaqsınız, həm də həyat yoldaşınıza doğuş seçimləri ilə bağlı qərar verməsinə kömək edəcəksiniz.

Sizin və həyat yoldaşınızın doğuş seçimləri, doğuşun ilk əlamətlərini müəyyən etmək və xəstəxanaya getmək barədə oxumağa davam edin.

Gələcək valideynlərin istifadə edə biləcəyi bir neçə doğuş seçimləri var – bu qərar həyat yoldaşınızın özünü hansı ilə ən çox rahat hiss edəcəyindən, ananın və ginekoloqun körpəniz üçün hansının ən yaxşı olduğunu düşündüklərindən asılıdır.

• Xəstəxana doğuşu – qadınlar arasında geniş yayılmış seçim. Xəstəxanada xüsusi qayğı halları üçün həkim və ginekoloqların yanınızda olması sizə əlavə əminlik verəcək.
• Evdə doğuş – əgər həyat yoldaşınız körpəni ona daha rahat və tanış mühitdə dünyaya gətirmək istəyərsə, evdə doğuş seçimi ola bilər. Həyat yoldaşınıza ev şəritində epidural anesteziya edilməsi mümkün olmayacağı üçün və fövqəladə yardıma ehtiyac olarsa, xəstəxanaya aparılmaq ehtimalı olduğuna görə, bu qərar ginekoloqla birlikdə verilməlidir.
• Doğuş mərkəzləri – bu yerlər xəstəxanaya nisbətən daha rahat, evsayağıdır və birbaşa doğuş ehtimalı daha çoxdur. Adətən doğuş mərkəzlərində ailəvi palata, hovuz və əlavə terapiyalar kimi sizin ərazi xəstəxananızda mövcud olmayan xidmətlər təklif olunur.
• Suda doğuş – doğuş hovuzları uşaqlıq boşluğu mühitini imitasiya etmək üçün istifadə olunur, bu da doğuşun daha az stresli olması və körpənin daha az şok keçirməsi mənasına gəlir. Doğuş hovuzu kirayə edə biləcəyiniz halda, həyat yoldaşınız yuxarıda sadalananların hər birində, hətta evdə də hovuz doğuşu gerçəkləşdirə bilər.

Hamiləlik müddətində hər hansı bir sağlamlıq problemi və ya ağırlaşma müşahidə edilmədiyi halda doğuş seçimləri barədə qərar vermək bilavasitə sizdən və həyat yoldaşınızdan asılıdır. Siz və həyat yoldaşınız son dəqiqədə belə fikrinizi dəyişməkdə sərbəstsiniz və tibbi heyət qərarınıza uyğunlaşmaq üçün əlindən gələni edəcək. Həyat yoldaşınızın nəyi istəyib-istəmədiyi barədə qəti qərar verdiyinə əmin olun, bununla hamilə həyat yoldaşınız məşğul olarkən siz onun yerinə qərar verə biləcəksiniz.

Xəstəxanaya gedərkən həyat yoldaşınızı müşayiət etmək və ya avtomobil sürmək sizdə əlavə təzyiq yarada bilər, amma bu günə hazırlaşmağın yolları var:

• Tıxacın olması ehtimalını nəzərə alaraq xəstəxanaya gedən müxtəlif yolları tanıyın.
• Yolu nə qədər müddətə qət edəcəyinizi bilməyiniz üçün əvvəlcədən bu yolları sınaqdan keçirin.
• Parkinq şəraitini yoxlayın və ödəniş tələb olunacaqsa, özünüzlə pul götürdüyünüzdən əmin olun.
• Uşaq oturacağını avtomobildə yerləşdirməyi öyrənin.
• Uşaq oturacağı təlimatını əvvəlcədən avtomobilinizdə saxlayın ki, həmin gün evdə unutmayasınız.

Çox güman ki, həyat yoldaşınızın xəstəxana çantası doğuşa bir neçə həftə qalmış artıq hazır olacaq. Bununla belə, sancılar başlayanda onun fikri başqa yerdə ola bilər, buna görə də evdən çıxarkən doğuş planı və hamiləlik qeydlərini götürdüyünüzdən əmin olun.

Unutmayın ki, ən xırda əşyalar da lazımınız ola bilər. Siz özünüz üçün içində aşağıdakılar olan ayrı çanta hazırlaya bilərsiniz:

• Dəyişək paltar.
• Diş məcunu və fırçası, dezodorant kimi gigiyenik vasitələr.
• Əlüstü qidalar və su.
• Parkinq üçün xırda pul.
• Qəbul etdiyiniz hər hansı bir dərman vasitəsi.
• Ağrıkəsicilər – onlara həm sizin, həm də həyat yoldaşınızın ehtiyacı ola bilər.
• Kamera – batareyasının tam dolu olmasına diqqət edin.
• Enerji ilə tam dolmuş telefon – sancı müddətini hesablamaq üçün sekundomer tez-tez gərəyiniz ola bilər.
• Doğuşun uzun çəkəcəyi hal üçün bir qədər əyləncə – musiqi, kitab, hətta film yükləmək.

Xəstəxanaya çatanda ilk iş həyat yoldaşınızın ginekoloq tərəfindən yoxlanılması olacaq. Ginekoloq doğuşa hələ çox qaldığına qərar verərsə, həyat yoldaşınızın daha rahat mühitdə olması üçün sizə evə qayıtmağı tövsiyə edə bilər.

Əgər xəstəxanada qalsanız, həyat yoldaşınıza palatada çarpayı veriləcək və mama-ginekoloq doğuş planını burada onunla müzakirə edəcək. Bu müzakirədə iştirak edin ki, sizi nəyin gözlədiyini biləsiniz. Doğuş başlayan ərəfədə isə həyat yoldaşınızı doğuş otağına keçirəcəklər.

Əgər xəstəxanaya çatdığınız an artıq doğuş başlayarsa, həyat yoldaşınız birbaşa olaraq doğuş otağına aparılacaq və mama-ginekoloq burada onunla doğuş planını müzakirə edəcək. Bu mərhələdə hər şey sürətlə irəliləyərsə, sizin müdaxilə etməyiniz lazım gələcək, odur ki, həyat yoldaşınızın aşağıdakı seçimləri barədə məlumatlı olduğunuzdan əmin olun:

• Ağrıkəsici.
• Doğuş vəziyyəti.
• Körpə dünyaya gələrkən dəri təması.

Bəzi qadınlar hamiləliyin daha erkən dövrlərində qeysəriyyə əməliyyatına ehtiyacları olacağını güman edirlər, amma doğuşun həm ana, həm də körpə üçün riskli olduğu düşünülərsə, bu barədə doğuş ərəfəsində məlumat verilir. Əgər həyat yoldaşınızın qeysəriyyə əməliyyatına ehtiyacı varsa, təlaşa düşməyə ehtiyac yoxdur. Bu, adətən bir saat çəkən adi prosesdir və həyat yoldaşınız etibarlı əllərdə olacaq. Əməliyyatdan sonra sağalma altı həftə çəkə bilər, buna görə də həyat yoldaşınıza evdə daha çox dəstək göstərməyinizə ehtiyac var.

Son baxış: 20 may 2020